കേരളത്തില്‍ ജനകീയ പ്രശ്നങ്ങള്‍ ഏറ്റെടുക്കുന്നവരുടേയും സമരത്തിനിറങ്ങുന്നവരുടേയും ശ്രദ്ധക്ക്; നിങ്ങളെ കുറിച്ചുള്ള പൂര്‍ണ്ണ വിവരങ്ങള്‍ ഭരണകക്ഷിയിലെ മുഖ്യപാര്‍ട്ടിയായ സി.പി.എമ്മിന്റെ ചില നേതാക്കളെ ബോധിപ്പിച്ചതിന് ശേഷം മാത്രമെ നിങ്ങള്‍ സമരത്തിനിറങ്ങാവൂ...അവര്‍ പറയും സമരം ചെയ്യണോ അതോ സമരസപ്പെടണോ എന്ന്.. ഇല്ലെങ്കില്‍ കിനാലൂരില്‍ കണ്ടത് പോലെ ഒരു സമരം കൊണ്ട് മാത്രം സമരക്കാര്‍ ഭീകരവാദികളാവും; ചാണകം ആഗോള ഭീകരവാദികളുടെ ആയുധമാകും, പൊലീസ് തലതല്ലിപ്പൊട്ടിച്ച വയസനെ കൊണ്ട് സമരക്കാര്‍ എറിഞ്ഞിട്ടാണ് തലപൊട്ടിയതെന്ന് പറയിപ്പിക്കും..പിന്നെയോ.... സ്ത്രീകള്‍ തല്ല് ചോദിച്ചു വാങ്ങിയതാണെന്ന് വനിതാ കമ്മീഷന്‍ (ഇങ്ങനെ പറയാന്‍ എന്ത് കമ്മീഷനാണാവോ അധ്യക്ഷക്ക് കിട്ടുന്നത്) പ്രസ്താവനയിറക്കും.
രാഷ്ട്രീയക്കാരനാവാന്‍ നല്ല തൊലിക്കട്ടി വേണമെന്ന് ചെറുപ്പം മുതലെ പലരും പറയുന്നത് കേട്ടിട്ടുണ്ട്. പക്ഷെ വ്യവസായ മന്ത്രി എളമരം കരീമിന്റെയത്ര വേണ്ടി വരുമെന്ന് കരുതിയില്ല. എന്നെ പോലീസ് തച്ചേ എന്ന് പറഞ്ഞ് കാമറക്ക് മുന്നില്‍ അലറുന്നയാളെ സ്റ്റേജില്‍ കൊണ്ട് വന്ന് റിയാലിറ്റി ഷോ നടത്തിയ മന്ത്രിയുടേയും അനുയായികളുടേയും പ്രകടനങ്ങള്‍ ചാനലുകള്‍ക്ക് പണച്ചെലവില്ലാതെ കിട്ടിയ കോമഡി ഷോ ആയി. ആരോടാണ് മന്ത്രീ ഈ യുദ്ധ പ്യ്രാപനം? എന്തിനാണീ ഒളിച്ചു കളി? അവിടുത്തെ ജനങ്ങള്‍ താങ്കളുടെ മന്ത്രിക്കസേരയൊന്നും ആവശ്യപ്പെട്ടിട്ടില്ലല്ലോ. നൂറുകണക്കിന് ആളുകളെ കുടിയിറക്കി നിര്‍മ്മിക്കുന്ന പാതയുടെ യതാര്‍ത്ഥ ആവശ്യമെന്തെന്നും പാത നിര്‍ബ്ബന്ധമാണെങ്കില്‍ തന്നെ ജനജാഗ്രതാ സമിതിയുടെ ബദല്‍ നിര്‍ദ്ദേശം പരിഗണിച്ചു കൂടെ എന്നുമല്ലെ ചോദിച്ചുള്ളൂ? അതിന്റെ ഉത്തരം വളരെ ലളിതമായി ഒരു തവണ പറഞ്ഞ് കൊടുത്താലെന്താ. അതോ വികസനം പൂര്‍ത്തിയായതിന് ശേഷം മാത്രം വെളിപ്പെടുത്തേണ്ട വല്ല രഹസ്യവുമാണോ അത്? അവകാശ സംരക്ഷണത്തിന് വേണ്ടി സമരം ചെയ്യരുതെന്നും എല്ലാറ്റിനോടും സമരസപ്പെടുകയാണ് വേണ്ടതെന്നും പറഞ്ഞാല്‍ അത് ഉള്‍ക്കൊള്ളാന്‍ കുറഞ്ഞത് വികസനത്തിന്റെ ഇരകള്‍ക്കെങ്കിലും സാധിക്കില്ല എന്ന് തിരിച്ചറിയുന്നത് നന്നാവും.. ഇതൊരു ചെറിയ വിഭാഗത്തിന്റെ മാത്രം ആവശ്യമാണെന്ന് വരുത്തി തീര്‍ക്കാനുള്ള ശ്രമമാണ് ഇപ്പോള്‍ നടന്ന് കൊണ്ടിരിക്കുന്നത്. സി.പി.എം ഒഴികെയുള്ളവരുടെ പിന്തുണ ഈ സമരത്തിനുണ്ടെന്ന് വ്യക്തമായിട്ടും സമരത്തെ പാര്‍ശ്വവല്‍ക്കരിക്കാന്‍ നടക്കുന്ന ശ്രമങ്ങള്‍ എത്ര ഖേദകരമാണ്. ആ.. ജനനേതാക്കള്‍ക്ക് എന്തുമാവാമെന്നാണല്ലൊ അല്ലെ. അവര്‍ ആടിനെ പട്ടിയാക്കും, പട്ടിയെ പേപ്പട്ടിയാക്കും... ആവശ്യമനുസരിച്ച് എന്തുമാക്കും. ഒരു നുണ നൂറ് തവണ ആവര്‍ത്തിച്ച് വിശ്വസിപ്പിക്കാന്‍ ശ്രമിക്കുന്ന ഗീബല്‍ സിയന് വിപ്ലവ പാര്‍ട്ടിയിലും എത്ര അനുയായികളാ?
No comments:
Post a Comment